Vekas tilbod

av KR

...og DER var sumaren endeleg over, og me kan konsentrere oss om tilboda i norsk daglegvarehandel. Lat hausten og regnet koma, og tilboda strøyme på!

* Joker
40% på alle fiskeprodukt frå Findus rommar stort sett ikkje mykje, men me tilrår kapteinens fylte for dei som vil ha rask mat. 3 for 2 på Freia sine sjokoladeplater. Normalt vil me ha desse 200g-platene ned på 17-talet før me vurderar kjøp. Kyllingkjøtdeig 400g 22,90 gjev billeg middag, men sjølv har me aldri fått denne til å fungere særleg bra i panna. Go'morgen yoghurt er ein dyr start på morgonen, også til 9,90 pr stk.

* Spar
Stor tikronarsmarknad som rommar div taco, peparmakrell, blodpølse, kjeks og andre kjenningar.

* Obs
250g kaffi til 14,90 er ikkje gale, men vert slått av Ica sin 10-kronarsmarknad denne veka. Brunost til 49,90 kr pr kg er bra, både fløtemys- og gudbr.ost. 40% rabatt på Elvital-serien, jf elles firstpricerådet under.

* Mega
Mega har også tikronarsmarknad, og legg fram klassikarar som kremost og blodpølse. 20 "gårdsegg" til 30 kr er godt nok for oss. Gjer det ikkje godt å vite at hønsa går fritt i ein lagerbygning på 10 000 m2 ilag med 10 000 andre høns? Ah, leve forbodet mot burhøns.

* Rimi
Senkar prisen på matpakka, heiter det denne veka. Dei skal ha for å slå eit slag for matpakka, som eigenhendig sparar deg for titals av tusen kroner årleg. Me klarar imidlertid ikkje å late oss begeistre over prisane, sjølv om me ser Rimi er på rett veg med denne kampanja.

* Ica
Stor tikronarsmarknad med kaffi 250g, div texmex og div kjeks.

* Kiwi
Denne vekas kundeavis er eit 72 siders langt oppskriftshefte. Trekk for manglande prissetting.

* Europris
300g Kims til 15 kr er kanskje billeg, men det kostar i lengda... 2-pk Head and Shoulders 39,90 er eit bra tilbod, og ein pris me kan tåle. Pass imidlertid på å såpe inn det meste med FirstPrice sin shampo til 7,90. 12 hermetikkboksar til 30 kr ved kjøp av 12 like innanfor tomatpuré, mais, ananas og champignon er også eit bra tilbod. 5-pk nudlar til 10 kr er me heller ikkje framande for, sjølv om slikt vert særs eksotisk for oss her i bladstova. Til studenten: Diverse kasseroller frå kr 49 og steikepanner frå 59.