Kiwi sin datogaranti - ikkje akkurat 'well done'

av KR

Sparebloggredaksjonen skjønar sushi er moderne, og så klart vil me også vera moderne når alle andre er det. Difor har me lenge gått og glant på desse sushiboksane i butikken. Å gå på sushibar ville vera litt i overkant for småkårsfolk som oss.

Difor var det med stor begeistring underteikna i dag 8. mai kom over tre pakkar fersk sushi på boks datostempla 9. mai. Som den røynde lesar og sparar veit, gjev dette gratis vare på Kiwi.

Må likevel innrømme eg var skeptisk der eg sjekka datoen på fyrste, andre og tredje. Når dei var på veg ned i korga, måtte eg la dei falle tilbake i kjøledisken. Sushi er skummelt nok om det ikkje skal vera så tett på datoen. Dessutan hadde eg ikkje klart å ete tre pakkar fram til 9. mai, tenkte eg. Tanken gjekk vidare til kiwiraid i gamledagar. Her står du og legg gratis kiwivarer attende i disken, kva er det du held på med mann? Har det rabla fullstendig for deg?

Eg gjekk vidare, men måtte snu brått. Det hadde ikkje rabla for meg, eller kanskje... Så klart kan jo denne fisken steikast og trekkast som anna fisk, tenkte eg. Sushi er berre eit moteord, fisk er ei råvare med alle moglege tilberedingsmåtar - både den late (rå) og den meir saktmodige (trekking).

Som sagt så gjort, og vidare til kassa bar det. Beskjeden var imidlertid nedslåande; holdbarhetsgarantien gjeld ikkje for sushivarene eller anna fersk fisk og sjømat. Med det ber det vel tilbake til seiblokkene for sparebloggredaksjonen.

I natt jag drömde

av KR

Rettare sagt; det var eit mareritt.

Det er ikkje ofte eg hugsar kva eg har drøymt om, men det fins klåre unnatak frå regelen: Utgådde varer på kiwigaranti. Ja, slik er den - småkårsfolket sin våte draum.

Det er den draumen...

Sparebloggen har etterkvart vorten vidgjeten for sine datoraid på Kiwi, men me er ikkje mette av den grunn. Det har då vorte litt fangst også i sumar, men 7 pk spesialpølser frå Gilde er lite å skrive heim om. Måndag denne veka merka eg meg ein handfull pakkar marinerte spareribs på den lokale kiwibutikken. Sumaren er som kjend ikkje komplett før noko slikt har vore på grillen. Faktisk var utløpsdatoen 18.08.2012, akkurat på hell av sumaren, og varene kunne etter kiwigarantien hentast gratis 17.08.2012.

Ventetida var lang denne veka, og dagane var drøye. Dette skulle koma til å verte den lengste veka i mitt liv. Det var meg mot beteninga. Sparar versus kolonialist. Den gode mot den onde.

Det er den draumen me ber på...

Slagplanen vart lagt dagen før dagen. Her galdt det å stå opp i otta, og vera på plass før beteninga fekk summa seg mellom lukta av spareribs med og utan dato. Trikset er å koma før kl 0800 slik at minst mogleg av freebie-dagen går tapt. Og ganske riktig. Heile søvnprogrammet måtte forskyvast for å rekke denne dagen, klokka stilt 30 minutt fram.

Alt skulle likevel ikkje gå som planlagt denne natta. Det var tropevarme på Vestlandet, og underteikna måtte vri seg i søvn mellom svettetoktene. Det var uro i lufta.

Det er den draumen me ber på at noko vidunderleg skal skje...

Denne natta drøymde eg om kjølediskar på Kiwi. Det veit eg, for eg ville ikkje vakna. Eg drøymde om kjølediskar fulle spareribs utgått på dato. Faktisk var der nokre t-bonesteaks òg, men det er ei annan historie. Eg bråvakna kl 0700, svulten som ei løve. Dette var dagen å berre spasere inn på Kiwi og hente premien. Eg kunne høyre stemmer i bakhovudet mitt som minna om Olsenbanden "helmaks", "alt er taima og tilrettelagt", "det er bare å forsyne seg", "gi deg du'a, Kjell". Eg spaserte inn på Kiwi akkompagnert av Bent Fabricius-Bjerre.

Det heile var nedslåande! Kjøledisken var rydda. Spareribsa bortydda i butikk. Det var ikkje Kongen og knekten, det  var beteninga som hadde vore der kvelden før. "Amatører! Idioter! Pappskaller og hengerumper!"

Sparebloggen kjem sterkt attende, allereie måndag med vekas tilbod!

Eit framifrå kvinnfolk!

av SR

Kunne i dag lesa om eit framifrå kvinnfolk i Bergens tidende. Her er ei som veit å utnytta seg av butikkane sine store ord, og det er slikt me likar!

At dei i kassa slår seg vrang overraskar meg ikkje, då slike har ein tendens til å engasjera seg litt vel personleg i deltidsjobben sin. Når sjefen peikar på tvilstilfelle og linkande, minnar me om prinsippet om at kunden alltid har rett. I tillegg minnast eg ei reklame frå Kiwi på 90-talet der ein mann fekk dobbel pris attende for ein banan som var bøygd feil veg.

Her er det som vanleg berre å krevja sin rett, og det med butikken sine reklamefilmar i ermet.

Kiwi vart ribba - igjen

av KR

Kiwi kan det å drive butikk, dei let varene sine gå ut på dato - slik at me andre kan få plukke dei gratis. Som den trufaste lesar forstår, har underteikna på ny vore på Kiwi-raid.

Dette har vore eit langsiktig planlagt stunt, for eg har fulgt med på noko pinnekjøt i omkring 2 mnd. Det hadde seg slikt at like over nyttår, då Knut hadde jaga jula ut, kom eg over nokre stablar med pinnkjøt på Kiwi. Sesongen vart trygt over kan ein seie, men datomerkinga talte anleis; 28. februar 2012. Let's play the waiting game, tenkte eg - og la varene på minnet.

Og ganske riktig. Vinterferien kom og gjekk, og det var berre å spasere inn og forsyne seg av varene. 3 x 2,2 kg Lundals eldhusrøykt pinnekjøt til ein totalverdi av 1917 kr. Rett nok var det fristande å late varene gå ut på dato i ordets rette forstand, for soleis å kunne cashe inn pengane for godbitane. Kiwi kunne jo umogleg gje attende slik vare med jula passé for over 2 mnd sidan. Ein god arbitrage, då eg sjeldan kjøper kjøt for over 300 kr kg. Grådigheita var imidlertid for stor, frykta og fristelsen for at andre skulle finne varene det same - etter desse månadane skulle eg hente heim gevinsten. Som sagt så gjort, og ikkje berre det, røynde sparar. På vegen til pinnekjøtet ribba eg med meg 3 x fersk pizza av merket "Dagens" kjøtdeig, bacon og skinke til verdi av 283,50. Ein halv av desse kan drepe ein hest, middag for dagesvis skal eg seie. Dagen var fullendt då eg kom til kassa, betalte kr 17 for noko anna (ikkje-utgått) småtteri, smilte og takka for handelen.

Historia vil òg ha det til at eg dagen etter kom innom på morgonen og henta 1 kg serveringsklar Gilde skinkesteik til kr 161,30 som eg hadde merka meg dagen før (på pinnekjøtdagen), men den historia får eg servere ein annan gong.

På måndag er eg spent på om beteninga har plukka bort all den kyllingfileten som går ut 05.03.12... Vert det meir kylling i frysen min no, så er eg redd den stryk med av salmonella! Totalt har eg no raska til meg 23,7 kg kjøt på 9 veker. Dette skapar problem. Matlageret aukar meir enn eg klarar å putte i meg. Frysaren er på bristepunktet. 100-litaren har aldri vore så full som no, men heller ikkje så systematisk oppbygd og pakka. Lat oss likevel håpe på more, more, more!

Ny Kiwi-razzia

av KR

Sparebloggen held fram med å oppmode samtlege sparar om å sjå seg kring i hyllene til Kiwi. Underteikna fann i dag nye varer, frå tidlegare har fangsten vore særs god. I dag var det 11 stk 300g Prior kyllingfilet med utløpsdato i morgon 08.02 som låg der og dunsta av pengar på gata.

Det heile var nokonlunde tima, då eg var innom i går 06.02 og merka meg desse pakkane. Eg fekk meg imidlertid ikkje til å køyre innom i dag tidleg, men satsa på at menigmann korkje har augene med seg eller tør krevje å få varene gratis. Og ganske riktig låg filetane der no i ettermiddag, då eg svinga innom for å hente gevinsten. Totalt 22 filetar eller 3,3 kg til 490 kr samla. Greed is good.

Eg har no passert 17 kg filetkjøt gratis frå Kiwi på 6 veker, og no byrjar òg frysaren å verte rund og god. Her er det ypparlege middagar i månad på månad. Det fins kanskje ikkje gratis lunsjar, men det fins gratis midddagar - opptil i fleire månadar på rad hjå Kiwi. Det byrjar no å verte så mykje filetkjøt at gamle vanar må leggast om. Mellom anna ser eg meg tvungen til å droppe kjøtdeiga i fredagspizzaen, og erstatte med gratis filet av anten kylling eller storfe.

Gjer som Sparebloggen; putt indrefileten i pizzaen du òg!

Nytt Kiwi-raid

av KR

Som meldt under vekas tilbod kom eg i går kveld over eit parti kjøtvarer med utgongsdato 04.01 på Kiwi. Desse kunne følgeleg hentast gratis i dag, ut i frå Kiwi sin før omtalte datogaranti.

Det gjaldt å møta tidleg i døra, slik at beteninga ikkje rakk ryddene hyllene før meg. Like etter opningstid i dag tidleg trappa eg difor opp, spaserte inn og henta dei 6 pakkane med Gilde langtidsmørna flatbiff av storfe. Veni, vidi, vici!

Totalt 12 biffar, over 2,3 kg til ein verdi av 440 kr. Dette kjem på toppen av dei 11,5 kiloane med filetkjøt eg raska til meg like før julaftan. Fleire månadar med gratis middagar, og eg trur sanneleg det er meir å hente. Ikkje berre nær utgått på dato, men langtidsmørna også frå produsenten - det er Gilde det!

Årets fyrste tilbod

av KR

Året byrja ofseleg godt! For der det slapp på Kiwi, heldt det jommen fram; i dag henta undertekna heim ein gratis komlemiddag frå Fjordland. Endeleg slo antakelsane til - Fjordland-hylla må vera eit eldorado for utgådde varer. I tillegg lyt eg ta turen innom i morgon tidleg òg, for då er det ei hylle med storfekjøt som går ut... Sjølv om Kiwi har ope til kl 23 kan dei umogleg rekke å rydde den unna før eg kjem i morgon tidleg?

So til vekas tilbod:

* Joker
Klassikaren Findus fiskegrateng 450g til 10 kr er ein sparebloggklassikar, og no har eg faktisk berre ein att i frysen sidan sist - optimal timing frå Joker denne veka. Frokostjuice frå Eldorado 1,5 liter til 10 kr trur me er eit luretilbod, jf Coop, vatn er uansett å føretrekke i ein sunn kropp. Resterande del av tikronarsmart'n rommar mykje rape, men Tine Kremost og Denja-salatar til 10 kr stk kan tilrådast.

* Rimi
Epler 9,90 pr kg er då umåteleg billeg til Rimi å vera, all frukt under 10 kr kg tilrådast av Sparebloggen. Elles er Rimi eit langt gjesp også denne veka.

* Spar
Sler også til med tikronarsmarknad. Ein kilo "kyllingsnacks" (dvs div knokar og klubbar) selgast til 10 kr kg frå pakkar á 2,2 kg. Tilrådast på det sterkaste i supper og gryter. Fiskegratengen går også att her, ilag med 400g fløtepudding, blodpudding og 2 kg appelsiner - også til 10 kr stk. Ingen grunn til skjørbuk i 2012 heller. Diverse kjekspakkar er også eindel av tikronaren.

* Obs
40% rabatt på Findus denne veka, men dei kan neppe konkurrere på fiskegratengen lell! Coop sin juice 1,5 l selgast 4 for 50 kr. Lite å hente på matvarefronten, men manglar du ei lita kasserolle får du ein 1-litar til 49 kr.

* Kiwi
Forutan utgådde varer, momskutt og nøkkelhol... har ikkje Kiwi nokre særskilde tilbod denne veka.

* Ica
Maxi lanserar nakkekotelettane på denne tida av året, 29,90 er då ein sumarpris me kan tilrå om du vil ha avvenning frå julematen... Elles er det pika deg 10-kronarsmarknad hjå Ica òg. Anar me eit samarbeid her? Tine Kremost, fiskegrateng, blodpølse og div kjekspakkar til 10 kr kan tilrådast som vanleg.

* Mega
Norvegia 59,90 pr kg er då ikkje nett billeg, men er du i beit for ost kan me innvilge dispensasjon for hamstring inntil 1 kg denne veka. Elles går diverse frukt til 9,90 pr kg også her.

* Prix
Me har fått ei skrape då me skriv lite om Prix, denne veka kan me nemne 400g kyllingkjøtdeig til 17,40!

Julekvelden kom tidleg - Sparebloggen på razzia hjå Kiwi!

av KR

Velsigne juleskrømtet, for det har vore godt mot meg i år - og held fram så det steamar. Høyr berre her! I går kveld skulle eg nett innom Kiwi for å kjøpe meg ein pose kaffi. Eg plar stoppe så vidt ved kjøthyllene berre for å sjekke korleis dei ligg an med datoane, vel vitande om garantiordninga som vedkjem halvt og heilt utgådde varer. Brått peikte ein kylling på meg. Nærare bestemt litt av ganske mange kyllingar. Eg kvapp til; 1,2 kg kyllingfilet med utløpsdato 21.12.11. Eg stod der dagen før dagen.

Faktaboks:
Kiwi gjev deg vara gratis dersom ho går ut den dagen du handlar eller dagen etter. Du får erstatningsvare dersom vara er utgått på dato, og pengar dersom erstatningsvare ikkje fins/kan gjevast.

Roleg og beherska la eg i frå meg kaffiposen, bretta opp eitt erme og skreid til hyllene! Meir kyllingfilet venta, datoar vart sjekka og varer lagt i korga med smil om munnen. Så langt totalt 4,8 kg kyllingfilet frå FirstPrice. Ikkje berre billeg, alt skulle vera gratis. Eg dobbeltsjekka med beteninga, fekk stadfestinga. Vidare til hyllene. To pk grytekjøt frå Gilde kom også fram, totalt nærare ein kilo. Sum 650 kr gratis kjøt denne dagen. Nok til å koke middag for i ein heil månad. Alt av finaste, reinskore kjøt. Det bugna av gratisvarer i hyllene, og eg merka straks at enkelte datoar fordra retur neste dag og dagen der på.

Dag 2. Juleferien er i gong, enno betre tid til å romstere i hyllene til Kiwi. Denne morgonen galdt det å koma seg til hyllene før beteninga luktar lunta (les: varene). Eg hadde spesifikk kjennskap til eit par entrecôtar frå i går, som skulle vera merka 22.12.11 - og følgeleg kunne plukkast gratis i dag. Skuffelsen var stor, eg hadde i min kyllingrus dagen før sett feil pakkedato - ikkje utløpsdatoen. Eg ante likevel råd; gårsdagen synte at dei ikkje hadde kontroll i hyllene. No måtte eg gå grundigare til verks, sjekke kvar ei vare i kvar rad og hylle. Suksess! Ei heil hyllerad med kyllingstrimlar, totalt 10 pakkar (4 kg) merka utløpt 22.12.11. Eg raska det til meg. Alt gratis etter garantiordninga, og til alt overmål også nøkkelholmerka. Ikkje berre gratis, sunnast i klassen skal det vera dette Prior-kjøtet. Eg som har forbant meg på denne merkinga. Turen gjekk vidare. Kalkunfiletar ramla opp i korga, også det merka 22.12.11. Så møtte eg motstand i hyllene til Gilde. Mykje merka såvidt over nyttår, eg la det på minnet - og leita vidare. Langt bak dukka det opp nokre gamle varer merka 16.12.11, faktisk utgådde på dato i ordets rette forstand. Det var tale om langtidsmørna-serien til Gilde, faktisk tala. 2 pk pepparbiff og 1 pk indrefilet. Garantiordninga sikra her erstatningsvare og dagen var fullendt.

Kjøpmannen som passerte burde kunne ane uråd der han såg meg lesse korga full av dyrt kjøt, men han ante nok ein god handel og helste pent. Heilt korrekt! Ein sjeldan god handel: 11,5 kg reinskore, fint kjøt til ganske nøyaktig 1500 kr samla over to dagar. Alt gratis.

4 x 1,2 kg kylling, FirstPrice, sum 469,20
2 x 450g grytekjøt av storfe, Gilde, sum 172,49
10 x 400g kyllingstrimlar, Prior, sum 499
2 x 300g kalkunfilet, Prior, sum 123,80
1 x 240g langtidsmørna indrefilet av store, Gilde, sum 93,34
2 x 410g langtidsmørna pepparbiff av storfe, Gilde, sum 140,62

Når slike mirakel skjer så stutt oppunder jol, fer det meg til å tenkja på juleskrømtet - og Elias Blix. Gledeleg jol! Med dette gode gamle ordet helsar me kvarandre i denne sæle joletida. Yver heile sparebloggredaksjonen gjeng songen til dei mange tusund munnar der ute:

Glade jol! Heilage jol!

Ten pengar på butikken sitt dårlege samvit!

av SR

Nøkkelen til suksess på sparefronten er som kjend å aldri vera nøgd og tota mangel på skam. Det er difor viktig å alltid klaga på den minste lille feil, men før du går til butikken må du gjera deg nytte av omlag halvparten av produktet. På den måten får du maksimal utnytting! Det gjer at du i det minste får ny vare, som jo er ein god bonus!

Er du riktig heldig (og dyktig) kan du venta deg større uttelling. I skrivande stund ventar eg på eit gåvekort frå Bunnpris etter å ha ytra min vrede over den lokale sjappa. Slike må rettast til det sentrale eller regionale leddet, då det er dei som er livredde for dårleg omtale, ikkje dei feite butikksjefane som hevar løn uansett. Her er det viktig å diskré leggja ved adressa di, slik at dei lett kan senda ut gåvekort. Dette fungerar - som kjend frå tidlegare innlegg - òg bra retta mot produsentar.


Det er med andre ord ikkje noko negativt om du blir behandla som drit av den kvisete fjortisen i kassa, eller du ser at ein i klovnekostymet på Kiwi legg frukta attende i disken etter å ha mista den på golvet. Dette kan føra med seg gode bonusar om du berre seg deg ned og skriv om det i ein mail, og legg til at "slikt går verkeleg ikkje an!".





Kiwikofta har blitt sett på som ei hån mot urfolket si folkedrakt. Slå det fast i ein mail, og kanskje det ventar eit gåvekort som avlat?

Alarm!

av KR

Det er alarm på vegne av vanvittig mange sparar i det ganske land! Alarm! Alarm!

Kiwi sel for tida surra svinesteik til 38,90 per kilo. Beinfri. Denne held til minst 5 middagar, og vil med nokre poteter og steikesky gje middagar til under 10-kroningen.

Klag!

av SR

Det er ei kjend sak at det er mykje dårleg service, varer, reinhald og generelt alt ein betalar pengar for! Der og då er det irriterande, men i ettertid kan det bli til glede, rein økonomisk glede!

Ein god sparar er sjølvsagt klar over at det er mogleg å gjera seg rik på å kjøpa dårleg frukt hjå både Kiwi og Bunnpris, ta vare på kvitteringa, og krevja dobbel pris tilbake. Har du problem med å finna dårleg frukt (burde ikkje vera problem hjå Bunnpris vertfall!), så kan du kjøpa fin frukt og spare på den til den er dårleg. Kjøp så ny fruk (ny kvittering) og kom attende ei lita stund etter og klag på frukta. Her er det gode pengar!

Elles er det store moglegheiter viss ein vil spela på ulike produsentar sitt samvit. Send klage på produkt til produsenten, men hugs å leggja ved adressa. Nokre produsentar krev at du sender med ein smak av produktet som dei kan analyserast på labben deira. Uavhengingig av om det var usmak eller ikkje, så send med produktet. Det er ikkje naudsynt med meir enn ein liten bit, så kan du eta resten. Då sender produsenten eit plaster på såret, som alltid er gåvmildt! Me sparebloggarane har gjort dette til gangs, og har motteke mellom anna gåvekort (2-300 kr!), mjølmiksar og sjokolade.

Her gjeld den gyldne regelen om å klaga på alt! Me veit Vinmonopolet har etterlyst fleire produktklager, og reknar med 5-10 % produktfeil. Og når me fyrst er inne på alkohol, så fekk me tips frå ein som jobbar på Hansa om at ein må klaga på øl med lite skum på toppen. Her gjeld som vanleg regelen om å drikka opp halvparten fyrst, for så å slå fast til mannen i baren eller på polet at dette ikkje held mål.

Jubel: Spareblogg-TV om taparane på Luksusfellen er attende på TV3 onsdagar 20.30. There is no such fryd, as skadefryd.