Tilbod veke 33

av SR

Nytt skulesemester er i gong, og i desse tider er det viktigare enn elles å ikkje følgja straumen. Nye og uerfarne studentar og studiner går som kjend naivt til næraste butikk. Link likevel opp med desse, og sprei den glade bodskapen om Sparebloggen!

Spar
Har denne veka 40% på både kaffi og melonar. Vidare fortsetjer trenden frå i sumar med bogskinke til 16,90. Elles noterar me oss at kiloprisen på reker har gått opp til 19,90 kr/kg.

Prix
Har denne veka 2 for 1 på eit mindre utval produkt, mellom anna dei svindyre knekkebrøda frå Solruta. Her er det mogleg å gjera eit kupp for den som allereie har lagt seg til dyre vanar.

Joker
"Ukens joker" er denne veka 40% på eit utval Big one og Grandis. Her er det verdt å merkja seg at viss det er tomt for tilbodsvarene, har ein krav på ein verdikupong som gir deg rett til vara neste veke for same pris. Slikt går ikkje upåakta hen!

10-aren denne veka er 12 tacoskjell. Dette må likevel kunne kallast eit dårleg tilbod, då tacoskjell er noko 90-tals.

Bunnpris
Slår stort opp om priskrakk på 20-50%. Dette skal likevel vera permanent, så det er liten grunn til å hamstra. Er det planar om å ha taco på menyen, tilrår me likevel ein tur innom Bunnpris. Elles lite å melda om utover dei faste prisane. Rådet om å ikkje kjøpa anna enn det som er på tilbod i denne butikken står framleis ved lag, og erfaring tilseier at ein bør vera merksam på datostemplinga.

Mega
40% på all ost av typen Norvegia gjer at orginalen no er å få til brillefine 50 kr/kg. Her er det berre å rekna på forbruket, sjå opp mot best før-dato, og kjøpa det du treng. Her i huset er tre kilo ost i kjøleskapet, KR har sikkert meir. Heilgrilla kylling til 29,90 er heller ikkje til å grina over, og utgjer fort fire måltid åleina. Har Freia Melkesjokolade til 19,90 for 200 gram, men me avventar til Walters kjem til 16,90. Er du glad i frukt og grønt, tilrår me sjølvplukk på utvalde frukter og grønasker til 10 kr/kg. Ein slik kilopris på mango er eit godt gamaldags røvarkjøp!