Test: FirstPrice sin pepperonipizza

av KR

Sjølv spararar må av og til ty til den raske maten, og denne gongen fall valet på luksussegmentet av ferdigpizza; fersk pizza. For å bringe det fyrste til torgs, pizzaen er alt anna enn fersk - den er berre godt konservert.

Faktaboks
Produkt: FirstPrice pepperonipizza.
Pris: 17,90 + nokre skiver ost og ein klatt rømme.
Mat til: 1-2 personar. 3 med poteter attåt.

Funksjonalitet 2 av 5
Manglande enkel opningsmekanisme gjer produktet billegare, og alle har kniv i huset. Tendens til fastkleba pepperoniskiver i plastemballasjen er ikkje delikat, men også her kjem kniven til hjelp.

Appetitt 2 av 5
Botn med eit tynt lag tomatpuré, deretter ost, paprika, jalapeños, paprika og rikeleg med pepperoni. I tillegg kjem det fram ein god del fett eller olje under steiking, dette vert mindre delikat for kvart stykke du et. Den tørre bunnen vert fuktig av fettet i pizzafyllet, og ein endar ut med ei bunn som delvis er sprøstekt og delvis opplevast som rå. Pizzafyllet er ujamnt fordelt, og pizzaen gjer seg med nokre få osteskiver ekstra. Kanskje òg ein klatt rømme om du likar slikt.

Fordøyelse 1 av 5
Som då underteikna testa skinkepizzaen til FirstPrice rokka også pepperonipizzaen fordøyelsessystemet. Fyllet og den fettete deiga synast verkeleg å eksplodere med magesyra, og dette utløyser omlag 45 minutt etter fyrste bit ei stor trang til å besøke "huset" ("skåla" eller "trona" om du vil). Etter ti minutt med omlag laust og fast, og tendensar til kramper i mageregionen, er alt attende til normalen. Me har grunn til å tru at næringsgehalten i FirstPrice sin pepperonipizza er lågt, for underteikna har ein særs sterk mage.

Sparebloggen; testar eitt steg lenger!

Tilråding: Etter ei samla vurdering rår me i frå produktet, sats heller på Sparebloggen sin heimelaga pizza.