Ei god spareveke

av KR

Det har vore ei god spareveke. Gåvekorta frå Findus gjekk til å kjøpe 15 stk 450g Findus-fiskegrateng på ein 10-kronarmarknad hjå Obs. Det skulle halde til 20-30 middagar. Eg har bestilt gratis bygg- og kveiteris hjå Mølleren, og ikkje minst knipt på ein nærast tom bensintank heile veka. Sistnemnde er i grunn ikkje noko å vera stolt over, ettersom bilhald er galskap. Likevel må det gjerast så sparsomt som råd er.

Alt før den 30 mil lange turen ante eg at noko var gale, bensintankpila bikka for mykje til venstre; mot raudt. Som kjend er Sparebloggen økonomiske (og følgeleg miljøvennlege) sjåførar, og bensintanken heldt heile turen. Dagen etter varsla imidlertid bilen om tom tank, men underteikna køyrde på (i høge gir) i påvente av månadsskiftet. Med bensinkort sikrast ein nemleg rabattar og rentefri betalingsutsetjing med forfall kvar 30. dag i månaden. Undervurder aldri det rentefrie alternativet! Alt handlar då om å fylle tidleg i neste månad, snarare enn seint i inneverande månad.

Det vart nokre spanande køyreturar i påvente av 1. oktober, så klart. Tankane gjekk mot tom tank. Slagplan vart lagt, kven er det lurast å ringe? Lånar bensinstasjonane ut 5-literdunkar? Går det i det heile teke an å kontrollere bensinpistolen når ein fyllar på ein slik dunk? Spørsmåla var mange, og kilometrane gjekk. Onsdag kom. Eg var nær ved å trekke meg. Aldrig! Torsdag kom. Motet var på topp. Fredag kom. Kalendaren synte 1. oktober. Vegen gjekk mot bensinpumpa, kortet vart trekt og smilet kom. Lat heller pengane forrente seg på sparekontoen, enn å ta bensinrekninga nokre dagar før månadsskiftet. 16,5 kroner spart, inkl rabatten, og mange spanande køyreturar.